يبقى اللقا قسمة

حيران ما بين شطين
والقلب ما وصلشي
والعقل زي القدر ..
إن جه .. ميرجعشي
عدت فى بحره سنة
والسكة لسة بعيد
اللي الأمل فى عنيه
واعدني بلا مواعيد
كام موجة من غدرها ..
عالية ما ترحمشي
والمركبة صابرة
وبحملها تمشي
على كتفها بكرة
وف قلبها موجود
تحلم ف يوم تكبر
على شطها الموعود
والشوق فى قلب شراع
سهران مبينمشي!
يتلف بيه الحلم
يتدفي بيه رمشي
يظهر شعاع الشمس
الكون يكون بسمة
يملا الفضا أنغام
نسمة ورا نسمة
وآما يكون حيران ..
تتبدل الألحان..
زي السحاب تمشى
وتمطر الأحزان ..
والغيمة ما تروحشي
يصحى كلام الليل
على الآهات موجوع
ويدندن الحكايات ..
على وتر مقطوع !
وتغرق الكِلمات..
فى البحر متبانشي
والدفة بين اتنين ..
تغطس ما تطلعشي
القلب ولا العين ؟
سؤال بقولهولك
والحلم رايح فين..
والشط فى عيونك
كان قلبي ليك رحال ..
م الرحلة متعبشي!
لكن الرحيل صبار!
على شوكه مقدرشي
واللى انجرح م الشوك..
يخاف يبوس وردة
والحب لو مكتوب ..
يبقى اللقا قسمة