ولا تسوا

ما بين بيعة وبين بيعة حلال وحرام
وسلطة تتسرق تلزق فى إيد حكام
ولا تسوا
رصاصة ف قلب طارح خير
وكون قسوة
وزيف عايش يدوس فى ضمير
وحي بيبكي فى الغربة
مع كربة تزيد كربة
ما يلمح ضي
غير الثورة تخطي والطريق أشواك
وجندي هناك
بيرميها بالرصاص الحي
ودخان غدر يعميها عن نهارها الجاي
وتنزل دمعة ف عنيها على اللي كان
وتشعل كل أراضيها بنار بركان
ويتبدل توب الفرحة بتوب إسود
و الضريح ثوار
وكلمة ع الطريق تحوّد
تخش النار
ولا تنسى
تنادي بعزم ما فيها ولاد أبرار
لا يوم فروا ولا وطوا لجيش أشرار
ورغم الحزن فى ضلوعها أمل شايب
تميل ع الأخ وتعاتب
يردلها الحنين قسوة
بماله يذل يتأمر
ويتعالى على الحرة ويتكبر
ولا تقسى!
ولو ضاقت بأنفاسها
تعيش والرب يحرسها
ولا توهي وسط ناس تايهين
فاتوكِ ف حيرة بين نارين
طريقك إمشي فيه بقوة
ماليكِ فى الزمن صحبة
غير الوحدة
وقلب بيوفي فى الشدة
يوقف لك نزيف الدم
يداوي فى الجراح تتلم
وترجع ع الطريق ضحكة