قالوا يارب ارقنا كرامة

ياختي جماله دا كلو طعامه
سابوا ريموتنا في يد أوباما
لجل سعادته يقول ويقرر
يختار ريس مش بعمامه!!
أنا مش فارقه معايا نهائي
ولا وياكو هتفرق ياما ؟
أنا من يوم ماوعيت ع الدنيا
عايشين نرغي في فيلم رخامه
إن رئيسنا الجاي في ايده
خير ونعيم و أمان وسلامه
جاي ومعاه خيرات الدنيا
ونعيش تاني بكل كرامه
واحنا يادوب في الحلم نخطط
وان المصري دا قيمه و قامه
ويخدرنا كلام وحكاوي
دافنين راسنا تقولشي نعامه
عايزين حل يجينا معلب
لو يحكمنا خروف وحمامه
شوفوا تاريخنا الغالي بطوله
بس يادوب تشجيع وقيامه
جوانا كم من السلبيه
جوه وطنا ضيوف ياندامه!
ماهو كان جندي ومن ألبانيا
جه وحكمنا وكله شهامه!!
كان الباشا وبعده أولاده
خلوا الشعب عبيد بطعامه
واما العسكر قاموا بثوره
خلوا حياتنا نكد وغرامه
واللي هينطق أو يتكلم
يبقى ياويله ابن الخدامه
جاي يتطاول على أسياده
تبقى حياته خلاص دوامه
هي هتفرق ايه دي الوقتي
نفس البدله ونفس الخامه
خلونا مره ياخلق نفكر
ونشوف حل بكل صرامه
عمر الفقر ماكان في موارد
ولا كان عمر الأمن غمامه
تظهر وقت العوزه وفجأه
مانلاقيهاش وبكل رخامه
دا احنا الخير جوانا وفينا
قولوا يارب ارزقنا كرامه