اصل الحكاية

انا احسن واحد يقفش فيكى يا مصر


اثور اتضايق احس بقهـــــــــــــــر


أبقى زعــــــلان من جــــــــــــوه


بس ازعل عالصبح وانسى العصر





فى ذات اليوم وفى نفس التاريخ


من كل عام صوات وصـــريخ


قال ايه سنوية الميــــــــــت


كنتوا عملتولوا ايه وهو حى جريح





الكوسة فى بلدنا اسرع من الصاروخ


فى حضنها تتدفى عمرك فى يوم ما تدوخ


ولوعريان تتغطى


اصلها عندنا اغلى كتير مالخوخ





دنيا زى السيف تسهى تقطعك


وحظ مالوش كيف غير انه يلطعك


عايش ومش عايش عارفلا مش عارف


اللى بتاخدو فى حياتك لابد يوصلك




يا ابويــا ياللى علمتنى الكلمـــة


ليه علمتنى اكون نسمة مش حمى


واعيش اتعذب انا بطيبتى


اللى فى الزمن ده تهمـــــــــة




ماشى عالحبل انا بوشوش


مرعوب اقع خايف من المشاويــــر


بس مستمتع بلعبى لانى مهمـــا وقعت


قلبى السعيد حيطير




قالوا ده صاحب قلت ده بوشين


قالوا حبيبك قلت بس منيـــــن


ده لا يعرف العشرة ولا يصونها


ده لو يطول كان باعنى مرتيــن





مخنوق ليه يا صوت البكا ولا الدموع مش كافيه


كل اللى حبتهم يا قلبى جابـــــــــولك الكافيـــــه


مبقتش فاهم حاجة خالص


هى الندالة سايقة الدنـيـــــــــــــــا بالعافيــــــــه




قلبى ضعيف بس الفــرح دواه


الحزن مالكو من براه ومن جواه


خايف اسلم يبقى قلبى عبد وذليل


للحزن بس هواه




قــالوا السنين بالذكريــــــات


والعمر نحسب منه اللى فات


قلت نحسب الجى احسن


يا حبيبى ده اللى فات مــات





ادم وحوا كانوا ابويا وامـــــــــى


ومش لاقى بنى ادم اشكيلوا همى


والمفروض كلنـــا اخــوات بس احسنلى


اسكت واتكسف على دمى





نرجع مرجوعنا تانى لموضوعنـــا


التوهه طويلة واخرتها رجوعنـــا


نتعب من شوقنا وليالى فراقنا


القلب يخانق فى البعد ضلوعنــــا





فى لحظة النصر متبقاش حاسس بنفسك


وساعة الخسارة اكيد بتموت من يأسك


والدنيا كده وكده بس المهم انك


عشان مكسب متخسرش نفسك




نفسى اقول يا صافيه زى اللبن بس اللبن غشوه


ده احنا بقينا فى زمن الواد بيبيع ابـــــــــــــــوه


وانتى معااهم علينا دايسين فوق رقابينا


يا مصر حتلحقينا ولا خلاص حنتــــــــــــــوه




واخد الدنيا فى حضنى فى رقصة


لا ناقص حزن ولا هى ناقصــــة


و بنمثل روايه جهنميه


لكن بموت فيها ف اخر القصة




قاللى ابويا اهم حاجة الكرامة


وطالما على حق مش مهم الملامة


وكبرت انا لقيت الدنيا اتغيرت


وان الندالة اول طريق السلامة




طظ فيكى يا دنيا يا مهببة


لكل احزان البشر انتى متسببه


بحبك واكرهك معرفش ليه


مفيش مرة تحنى وتبقى طيبة


وعجبى ................................