الغبى والعبيط

الغبى:ايه يا كوتش كنت فين كدا
العبيط:كنت بتفرج على ماتش كورة انما اية من الاخر
الغبى:مين اللى كان بيلعب مع مين
العبيط:مش عارف والله يافهيم هو كان فية فرقة لابسة اسود والتانية لابسة اخضر
الغبى:اه يبقا الاهلى والاسماعيلى المهم مين كسب؟
العبيط:والله يافهيم مكدبش عليك تقريبا الفرقة الاولى جابت جون والتانية جابت جونين تلاتة كدا يعنى
الغبى:اها!!!!.....طيب ما تقول اتعادلو ياعم هتفضل اهبل لامتى؟
العبيط:بس متقولش اهل يا فهيم هو انت عشان بتفهم كورة يعنى وانا لسة على قدى؟هتفضل تقطم فيا
الغبى:طيب خلاص معلش يا ناصح انا بهزر معاك يااخى
العبيط:خلاص ياعم عادى مانا واخد منك على كدة
الغبى:اما انا شوفتلك حتت ماتش من اللى قلبك يحبهم انا عارف انك بتحب الدورى الانجليزى يا ناصح صح
العبيط:اه والله يافهيم انا بحبة اوى وبحب اللاعيب اللى بيحط ايدة فى بوقة دا
الغبى:مين دا اللى بيحط ايدة فى بوقة؟؟؟
العبيط:ياض اللى بيحط ايدة فى بوقة دا لما يجيب الجون استنا هقولك اسمة ....اسمة..... اسمة اهههه اسمة توتو
الغبى:اه هو توتى
العبيط:بس توتى مش بيلعب فى الدورى الانجليزى توتى بيلعب فى روما .....يعنى الدورى الاسبانى يا ابو المفهومين
الغبى:يا عم متدقش......المهم ماتش اية اللى انتة شوفتة
العبيط:كان نهائى اوروبا بين برشلونة وانترناسيونال البرازيلى
الغبى:اه يااااااه تلاقية كان ماتش نار
العبيط:اه يا بنى ماتش جامد اوى وخلص تعادل
الغبى:يعنى مين اللى كسب
العبيط:يا بنى مش برشلونة بتلعب اكيد هى اللى كسبت
الغبى:اه.....لا برشلونة حلوة
العبيط:امتى بقا الواحد يشوف كورة حلوة فى مصر
الغبى:اة والله زمان كان الخطيب يلاعب فرقة بحالها لوحدة
العبيط:تصدق ياض اول مرة احس انك بتفهم
الغبى:اية ياعم انت فاكرنى اهبل ولا اية الخطيب دا اسطورة وياما جاب بطولات للزمالك.......كان متأاق بالفانلة الصفراء
العبيط:يابنى خطيب اية اللى كان بيلعب فى الزمالك الخطيب كان بيلعب فلى الاهلى مع صالح سليم
الغبى:اهو صالح سليم دا بقا مشكلة لوحدة؟
العبيط:لية يا استاذ يا ناصح
الغبى:كان لعيب كورة جامد اوى وفى نفس الوقت كان بيغنى ومشهور
العبيط:صالح سليم مين اللى كان بيغنى
الغبى:صالح سليم اخو حسام سليم الممثل دلوقتى
العبيط:يا بنى لأ مكنش بيغنى
الغبى:امال كان بيعمل اية
العبيط:كان بيروح يقف معاهم فى الاذاعة بس
الغبى:بقولك اية يلا بينا بقا علشان نلحق نروح نشوف الماتش
العبيط:ايه دا هو فى ماتش النهاردة
الغبى:اه يابنى النهاردة اول ماتش لمصر فى الكاس
العبيط:هيلاعبو مين السعودية
الغبى:يابنى السعودية دى فى اسيا يعنى تبع اليورو
العبيط:امال مين اللى هيلاعب مصر
الغبى:مصر هتلاعب النهاردة الكاميرون والله الواحد خايف من دروجبا رجلة تقيلة وممكن يعملها معانا
العبيط:هو دروجبا بيلعب فى الكاميرون
الغبى:لا هما واخدينة اعارة سنة بس
العبيط:طيب يلا بقا علشان نلحق نروح نشجع الكاميرون
الغبى يلا بينا........



هو طويل شويه بس ان شاء الله يعجبكم
[b]

مقبوله